(الدفتر) إعداد- منى مشير:
يقدم موقع الدفتر لقرائه الأعزاء اليوم الحلقة الأسبوعية الثانية من حلقات مطبخ الدفتر، والتي ستم خلالها استعراض وصفة سهلة وبسيطة لعمل حلويات رموش الست في البيت إحدى الحلويات التي لها طعم لذيذ وشكل رائع ومفيد وبكل سهولة لمن يجربها للمرة الأولى.
وتتعلق حلقة اليوم بحلويات "رموش الست" التي تعد إحدى أبرز الحلويات الشرقية المحببة لدى الكثير من المصريين والعرب، مثلها مثل ما يعرف باسم بلح الشام، وصوابع زينب، والبقلاوة وغيرها من الحلويات الشرقية التي تستطيع ربة المنزل صنعها في البيت بأقل التكاليف الممكنة لتدخل السعادة والبهجة على الأسرة.
يتمنى لكم موقع الدفتر في التجربة التالية لطريقة عمل حلويات رموش الست أن تكون ممتعة وشهية فهي طريقة سهلة وتستحق التجربة، وكعادتنا نقدم طريقة العمل باللغة العامية كالتالي:
طريقة عمل حلويات رموش الست
مكونات أو مقادير حلويات رموش الست
٢ كوب دقيق عادي معاهم نص كوب دقيق سميد (دقيق بسبوسة)، وعليهم نحط ذرة ملح، وربع معلقة بيكينج بودر، وفي بولة تانية نخلط كوب سمن مع نص كوب سكر ونضربهم كويس لحد ما تبقي كريمي شويه كده.
هنضيف عليهم ربع كوب زيت وبيضه كاملة وبياض بيضة (وما تقلقيش الصفار هنستخدمه) ومعلقة صغيرة فانيليا ونقلبهم.
طريقة العمل:
بعد كده هنضيف عليهم الدقيق ونلمها مع بعضها ونشكلها قطع صغيرة ممكن على ظهر مصفى أو بالشوكة انتي وشطارتك بقى، ولو فاكرة الصفار اللي اتبقى من البيضة التانية هنحط عليه رشة بن أو نسكافيه وفانيليا وندهن بيه الوش.
بعدها ندخلها الفرن على درجة حرارة ١٨٠ ْ ويكون الفرن سخن من قبلها ولما تستوي وتصفر من تحت تبقى دهبي كده نشغل الشواية بسيط عليها بس خلي بالك وانتي بتشوفيها استوت ولا لا لأنها بتبقى ناعمة أوي وممكن تفرول منك.
في نفس الوقت نكون محضرين الشربات البارد (اللي هو عبارة عن ٢ كوب سكر وكوب ماء ويغلي كويس على النار وننزل عليه بنص ليمونة ويترك يغلي ٧ دقائق، وفي الآخر نضيف معلقة عسل ورشة فانيليا)، وننزل بالشربات وهو بارد على رموش الست أول ما نطفي عليها الفرن ونسيبها ترتاح شويه في الفرن وتشرب الشربات ونقدمها.
وبالهنا والشفا.