recent
أخبار ساخنة

طريقة عمل البيتزا في البيت.. تكات وأسرار "ولا أسهل من كده"

الصفحة الرئيسية

 


(الدفتر) إعداد- منى مشير:


تعد البيتزا من أحلى وأجمل الأكلات التي يحبها الجميع كبارا وصغارا، وبالطبع يريد الكثير عملها في البيت ولكنها تخرج في بعض الأحيان "غير مظبوطة" ساعات كتير لأن من أعدها لا يهتم أو لا يعرف "تكاتها".

وفي السطور التالية حاولنا جمع كل تفاصيل هذه الأكلة الممتعة وبشكل بسيط وبدون مغالاة كالتالي (وباللغة العامية للتسهيل):

طريقة عمل البيتزا في البيت


أولا: هنجيب ربع كوب لبن فاتر ونكمل الكوب مياه فاترة وندوب فيها نص معلقة صغيرة سكر ومعلقة كبيرة خميرة فورية ومعلقة زيت ونسيبهم علي جنب لما الخميرة تتفاعل كويس ودي أول تكة "لازم الخميرة تتفاعل وتبقي ناجحة".
 
ثانيا: في بولة غويطة نضع 3 أو 4 كوب دقيق وعليهم نص معلقة صغيرة بيكينج بودر وذرة ملح، وفيه ناس بتحب تحط زعتر وبصل بودر ثوم بودر دي حاجة ترجع للي بتحبيه، ونخلط عليهم كوب المياه اللي حضرناها بالخميرة ونعجن كويس أوي ودي التكة الثانية.

التكة التانية: "لازم أي عجينة من المعجنات علشان تبقى ناجحة نعجنها كويس أوي مش نلمها وخلاص.. طبعا العجينة زي ما تلم معانا لو احتاجت رشة دقيق زودي ولو احتاجت حبة مياه زودي لحد ما تلم معاكي وتبقي كويسة".
 
ثالثا: هنغطي العجينة ونسيبها ترتاح تخمر كويس أوي وما نستعجلش عليها.
 
رابعا: هنفرد العجينة بعد ما تخمر كويس ويا ريت بلاش تبقى رقيقة أوي خلي سمكها كويس وحطيها في صينية وخرميها بالشوكة كويس.
 
خامسا: نفرد عليها الصلصة اللي هي عبارة عن 2 معلقة صلصة ومعاهم معلقة صغيرة زعتر وبابريكا، وربع معلقة سكر أو عسل، وملح وفلفل، ومعلقة زيت، ونقلبهم ونضع معاهم حبة مياه صغيرة لحد ما يبقي قوامها مناسب، في ناس بتحب تحط فص ثوم مفروم أو بصل وثوم بودر دي حاجه ترجعلك واللي بتحبي.
 
سادسا: هنسيبها ترتاح تاني وهي في الصنية وتعلى شوية تاني.
 
سابعا: حطي طبقة موتزاريلا وبعدين حطي اللي بتحبيه وفلفل ألوان متقطع شرائح وزيتون وطبقة موتزاريلا تاني على الوش.

ثامنا: الفرن لازم يكون سخن على درجة حرارة 160 ونحطها فيه مش هطول عليها أول ما الجبنة اللي على الوش تسيح كلها يبقى كده تمام نخرجها.
 
بلاش نشغل الشواية عليها أفضل علشان الجبنة الموتزاريلا ما تنشفش منك وتبقى بتمط معاكي وحلوة وبنقدمها مع الكاتشب.
 
معانا وصفات الطبخ سهلة وبسيطة، وبالهنا والشفا.

google-playkhamsatmostaqltradent